على ذكراك انا باقي
اداري غصة اشواقي
والوّن هالصباح .. جراح
عسى يرضيك اشراقي؟
عساك تشوفني بعدك ..؟
تشوف شلون في بعدك
غيابك شوّه اعماقي
..
كفاك ارجوك
تعال وخذني بكفوفك.. إلى كفوفك ..
تعال ونسّني ظروفك
ابي تعلمني كيف ابقى .. وتبقى هناك!
ابي ترجع تعلمني.. ابي انساك!
تعال وضمني لحضنك شوي..ولا ترجعني!
تعال فحضنك ارزعني
وانا انبت لك مية شوق.. ومية حب.. ومية غيره!
تعال نضيّع الحيره!
....
تعبت من الوله كافي!
تعبت من الظما كافي!
قضى صبري على بابك وهو غافي
..
تعال ارجوك
تعال ودوك..
تعال ودوك ذا عمري!
ترى الدنيا ولا تسوى سواك ان كنت ماتدري..
ابي تسمع كلامٍ قلته لعيونك ..بليّا صوت
ابيك تحس بي .. باموت!
وابي تدري عن الخافي
عن ايامٍ مضت بي حلم
وعن ايامٍ بقت لي حلم
وعن قلبٍ مضى له عام في صدري ..
رضا بك حلم !على ذكراك هو باقي ..
وعلى ذكراك انا باقي..
وكل العمر يمضي بي ..
وانا باقي .....على ذكراك ..